बीरगंज । विगत चार महिनायता पर्सा प्रहरीले विभिन्न मुद्दामा फरार ६२ जना अभियुक्तलाई पक्राउ गरी अदालतमा बुझाएको छ ।
अदालत बुझाए लगतै अभियुक्तहरूलाई सजाय भुक्तानका लागि बीरगंज कारागारमा पठाइएको जिल्ला प्रहरी कार्यालय पर्साका प्रवक्ता ओम प्रकाश खनालले बताउनुभयो ।
चार महिनाको अवधिमा अदालत पर्साबाट विभिन्न समयमा सजाय फैसला भई फरार रहेका ६२ जना अभियुक्तलाई बारा, पर्सालगायत भारतमा लुकिछिपी बस्दै आएको अवस्थामा पक्राउ गरिएको हो ।
प्रहरीले गएको साउनदेखि आजसम्म फरार ६२ जना अभियुक्तलाई पक्राउ गरेको पर्साका प्रहरी प्रवक्ता खनालले बताउनुभयो ।
पर्सा प्रहरीले साउनमा ५ जना, भदौमा २३ जना, असोजमा १९ जना र कार्तिकमा १५ जना फरार अभियुक्तलाई पक्राउ गरेको थियो ।
उनीहरूबाट १ करोड ७८ लाख ४७ हजार रुपैयाँ जरिवाना असुल समेत गरिएको छ ।
पर्सामा अन्य फरार अभियुक्तहरूको समेत खोजी भई रहेको प्रहरी प्रवक्ता खनालले बताउनुभयो ।
गत आर्थिक वर्षमा पर्सा प्रहरीले ८० जना फरार अभियुक्तलाई पक्राउ गरेको थियो ।
https://ift.tt/3DRNsm9
