बीरगंज । पटेर्वासुगौली गाउँपालिकाको भ्रष्ट्राचार विरुद्ध आमरण अनसन बसेका रामजन्म ओझैयाले उठाएका जायज माग पुरा गर्ने सहमति भएसँगै ११ दिन देखिको अनसन टुङ्गिएको छ ।
पर्साका निमित्त प्रमुख जिल्ला अधिकारी भिम कान्त पौडेल सहितको टोलीले एक साथ अनसनमा बसेका ओझैयालाई जिल्ला प्रशासन कार्यालय पर्सामा आज भएको सहमतिपछि जुस खुवाएर अनसन टुङ्गिएको घोषणा गरिएको थियो ।
सो अवसरमा अनसनमा बसेका ओझैयाले राखेका मागका सम्बन्धमा गाउँपालिकाले गर्न सक्ने काम पालिका स्तरबाट गर्ने र नसक्ने विषय सङ्घ र प्रदेश सरकारसँग पुरा गर्न अनुरोध गर्ने, गाउँपालिकाको कर्मचारी र दरबन्दी मिलान गर्ने, गाउँपालिकाले गर्दै आएका कामको सार्वजनिक सुनुवाइ गरिने सहमति भएको छ ।
गाउँपालिकाको अनियमितता विरुद्ध ओझैयाले मङ्सिर १५ गतेदेखि १९ गतेसम्म धर्नामा बसेको र माग पुरा नभएपछि मङ्सिर २० गतेदेखि आमरण अनशन सुरु गरेका थिए ।
मुख्य रुपमा ओझैयाले गाउँपालिका र वडा कार्यालयहरूमा कर्मचारीहरू समयमा उपस्थित भई काम गर्नुपर्ने, प्रमुख प्रशासकीय अधिकृतको सरुवा गर्नुपर्ने, गाउँपालिकामा भएका विकास कार्यको उपलब्धिबारे स्थानीयवासीलाई जानकारी गराउनुपर्ने, गाउँपालिका अन्तर्गतका खेलाडीहरूका लागि खेलमैदान, प्रतियोगिता, प्रशिक्षकको व्यवस्था, तलब भत्ता तथा खाने–बस्ने व्यवस्था गर्नुपर्ने, कृषिलाई आधुनिकीकरण गर्न मल खाद तथा उपकरणहरूको सुविधा उपलब्ध गराउनुपर्ने, लगायतका माग राखेका थिए ।
मागका बारेमा समग्र छलफल भएको र जिल्ला प्रशासन कार्यालयमा आज पटेर्वासुगौली गाउँपालिकाका अध्यक्ष हरिनारायण चौधरीसहित उपाध्यक्ष, प्रमुख प्रशासकीय अधिकृत, जिल्ला प्रहरी कार्यालय पर्साका प्रहरी उपरीक्षक रमेश बस्नेत, विभिन्न राजनीतिक दलका प्रतिनिधि, गाउँपालिकाका शिक्षा, कृषि, स्वास्थ्य शाखाका प्रमुखहरू, वीरगंजका सञ्चारकर्मीहरूको रोहवरमा सहमति भएको निमित्त प्रमुख जिल्ला अधिकारी पौडेलले बताउनुभयो ।
https://ift.tt/eA8V8J
प्रतिक्रिया लेख्नुहोस्