वीरगंज । सामान्य रुघाखोकी र ज्वरोको लक्षण देखिएका व्यक्तिहरूको स्वास्थ्य परिक्षण गर्दा वीरगंजमा ६ जनामा कोरोना संक्रमण पुष्टि भएको छ ।
मङ्गलवार वीरगंजस्थित नारायणी अस्पतालको प्रयोगशालामा ३४ जनामा भएको पिसिआर परिक्षणमा ६ जनामा कोरोना संक्रमण पुष्टि भएको हो ।
संक्रमित सबै महिला रहेका छन् । उनीहरूको उमेर समूह १८ देखि २० वर्षको रहेको नारायणी अस्पतालका कोभिड संयोजक डा.उदय नारायण सिंहले जानकारी दिनुभयो ।
मुलुकमा पछिल्लो समय कोरोना सङ्क्रमणको ग्राफ बढ्दै गएको छ । डा. सिंहका अनुसार नागरिकले कोरोना विरुद्धको खोप लगाएपछि सामाजिक दुरी कायम गर्ने, स्यानिटाइजरको प्रयोग गर्ने लगायतका स्वास्थ्य मापदण्ड पालना गर्न छाडेका कारण बीरगंजलगायत देशैभर पुनः कोरोना संक्रमण फैलिँदै गएको छ ।
हाल छिमेकी मुलुक भारतमा समेत कोरोना संक्रमण बढिरहेको कारण वीरगंजलगायत प्रमुख सिमानाकामा रहेका सहरका बासिन्दाहरूले उच्च सतकर्ता अपनाउनुपर्ने चिकित्सक डा.सिंहले बताउनुभयो ।
स्वास्थ्य परिक्षण गराएका ३४ जना मध्ये ६ जनालाई संक्रमण भेटिएपछि अब वीरगंजमा कोरोना संक्रमण समुदाय स्तरमै फैलिन सक्ने सङ्केत देखा परेको चिकित्सक उहाँले बताउनुभयो ।
