वीरगंज । धान उत्पादनको उर्ब जिल्लाको रुपमा रहेका बारा पर्सामा जिल्लामा आज सम्म ९५ प्रतिशत धान रोपाइँ सम्पन्न भएको छ ।
चालु आर्थिक बर्ष ०७९÷८० मा चैते धान बाली रोपिएको र पानी जमेको जग्गा बाहेक ९५ प्रतिशत रोपाई योग्य क्षेत्रको रोपाई सम्पन्न भएको कृषि ज्ञान केन्द्र बारा पर्साले जनाएका छन् ।
बर्षे धान मध्ये भदैया र अगहनीगरी बारा जिल्लामा ४६ हजार हेक्टर क्षेत्रफलमा विभिन्न जातका धान रोपाई सम्पन्न भएको र अझै ५ प्रतिशत क्षेत्रफल धान रोप्न बाँकी रहेको कृषि ज्ञान केन्द्र बारा कलैयाका कार्यालय प्रमुख जितेन्द्र प्रसाद यादवले बताउनुभयो ।
बारामा यस बर्ष ११ हजार ९ सय ३१ हेक्टर क्षेत्रफलमा भदैया र ३४ हजार १ सय ६५ हेक्टर क्षेत्रफलमा अगहनी धान खेती गरिएको छ ।
धानको बिउ छर्ने बेलामा पर्याप्त पानी परे पनि रोपाइँको समयमा पानी नपर्दा यस वर्षको खेती खर्चिलो भएको ज्ञान केन्द्रका बाली विकास अधिकृत एवम् सूचना अधिकारी राजनारायण साहले जानकारी दिनुभयो ।
आकाशे पानीको भरमा धान रोपाई गर्नु पर्ने बाध्यता रहेको बाराको ग्रामीण क्षेत्रमा साउनको पहिलो सातामा समेत पर्याप्त पानी नपरेपछि किसान चिन्तित भएका थिए ।
यसैगरी पर्सामा पनि साउनको पहिलो साता देखि पानी पर्न थालेपछि ९५ प्रतिशत क्षेत्रमा धान रोपाई सम्पन्न भएको कृषि ज्ञान केन्द्र पर्साका जितेन्द्र यादवले जानकारी दिनुभयो ।
पर्सामा यस बर्ष ३८ हजार हेक्टरमा धान रोपाई सम्पन्न भई सकेको यादवले बताउनु भयो ।
