वीरगंज, ४ जेठ ।
मंगलवार वीरगंजमा ४ जना कोरोना सङ्क्रमितको मृत्यु भएको छ भने ९५ जना संक्रमित थपिएका छन् ।
वीरगंजस्थित नारायणी अस्पतालमा उपचारार्थ भर्ना भएका २ जना, वीरगंज हेल्थ केयर र भवानी अस्पतालमा १र१ जना मृत्यु भएको छ ।
नारायणी अस्पतालमा बाराको प्रसौनी गाउँँपालिका वडा नम्बर २ निवासी ४१ वर्षीय पुरूषको आज बिहान मृत्यु भएको छ । स्वास्थ्य मा समस्या भएर वैशाख २० गते भर्ना भएका पुरूषमा त्यही दिन एन्टिजेन परीक्षण रिपोर्ट पोजेटिभ आएको र निमोनियाका कारण श्वासप्रश्वासमा समस्या भएर आज बिहान उनको मृत्यु भएको नारायणी अस्पतालका कोभिड संयोजक डा. सरोज रोशन दासले बताउनुभयो ।
यस्तै रौतहट राजपुर नगरपालिका वडा नम्बर वडा नम्बर १ बहुअर्वा निवासी ६० वर्षीय पुरूषको उपचारको क्रममा आज मृत्यु भएको छ । स्वास्थ्यमा समस्या भएर वैशाख २८ गते भर्ना भएका पुरूषमा सोही दिन एन्टिजेन परीक्षण रिपोर्ट पोजेटिभ आएको र उपचारको क्रममा आज मृत्यु भएको डा. दासले बताउनुभयो ।
यस्तै वीरगंज हेल्थकेयरमा आज बिहान वीरगंज महानगरपालिका वडा न १५ निवासी ५८ वर्षीय पुरूषको उपचारको क्रममा मृत्यु भएको छ । वैशाख २६ गते अस्पताल भर्ना भएका उनको सोही दिन एन्टिजेन रिपोर्ट पोजेटिभ आएको र आज बिहान उपचारको क्रममा मृत्यु भएको जिल्ला प्रशासन कार्यालय पर्साका कोभिड सम्पर्क व्यक्ति एवं प्रशासकीय अधिकृत बिनय कुमार श्रीवास्तवले जानकारी दिनुभयो ।
यसैबिच वीरगंजको भवानी अस्पतालमा उपचारको क्रममा आज बिहान वीरगंज महानगरपालिका वडा न १५ निवासी ५२ बर्षीया महिलाको कोरोना सङ्क्रमणका कारण मृत्यु भएको श्रीवास्तवले बताउनुभयो ।
यसैगरी नारायणी अस्पतालका कोभिड संयोजक डा. सरोज रोशन दासले वीरगंजस्थित नारायणी अस्पतालमा गरिएको पछिल्लो पीसीआर परीक्षणको क्रममा थप ९५ जनालाई कोरोना संक्रमण पुष्टि भएको जनाएका छन् ।
२ सय ८८ जनाको पीसीआर परीक्षणको क्रममा ९५ जनामा कोरोना संक्रमण पुष्टि भएको नारायणी अस्पतालका कोभिड संयोजक डाक्टर सरोज रोशन दासले जानकारी दिनुभयो ।
संक्रमण पुष्टि हुनेमा ६७ जना पुरूष र २८ जना महिला रहेका छन् । संक्रमित मध्ये ५८ जना पर्सा जिल्लाको रहेका छन् भने बाराका २१ जना, रौतहटका ९ जना, सर्लाहीका ७ जनामा कोरोना संक्रमण पुष्टि भएको डाक्टर दासले बताउनुभयो ।
सङ्क्रमितको उमेर समूह १४ वर्ष देखि ८३ वर्ष सम्म रहेको र सङ्क्रमितको सिटी भ्यालु १४ दशमलव ९ देखि ३५ सम्म रहेको नारायणी अस्पतालका कोभिड संयोजक डाक्टर दासले जानकारी दिनुभयो ।
विगत ३ दिन देखि वीरगंजमा कोरोना सङ्क्रमितको संख्या घट्दै गएको छ । विगतमा संकलित स्वाब परीक्षणको क्रममा ६० देखि ८० प्रतिशत सम्म संक्रमित देखिने गरेकोमा हाल संकलित स्वाब परीक्षणको क्रममा ३० देखि ४० प्रतिशत सम्म सङ्क्रमणको दर देखिएको छ ।
प्रतिक्रिया लेख्नुहोस्