बीरगंज । चाडबाडलाई लक्षित गर्दै सरकारले खाद्य सामाग्री छुट मूल्यमा विक्री वितरणका लागि व्यवस्था मिलाएको भए पनि वीरगंजमा छुटमा खाद्यान्न उपलब्ध गराउँदा समेत उपभोक्ताहरू नपुगेको गुनासो खाद्य व्यवस्था तथा व्यापार कम्पनीले गरेको छ ।
दुर्गम जिल्लामा खाद्यान्न नपुगेर हाहाकार भइरहे पनि पर्सा, बारा, रौतहट जिल्लाहरूका उपभोक्ताहरू खाद्य व्यवस्था तथा व्यापार कम्पनीको गोदाममा चाडपर्वका बेला पनि छुटमा चामल किन्ने नजाने गरेको भेटिएको छ । मध्य तराईको पर्सा, बारा र रौतहटका उपभोक्तालाई लक्षित गरी पर्सामा रहेको राज्य मातहतको खाद्य व्यवस्था तथा व्यापार कम्पनीमा चाडपर्वलाई लक्षित गरी उपभोक्ताका लागि बिक्री खुला गरिएको छ ।
तर, असोज १ देखि चाडपर्वलाई लक्षित गरी खाद्यान्न छुटसहित बिक्री खुला गरिएको कम्पनीबाट १९ दिनको समयमा साढे चार क्विन्टल मात्र चामल बिक्री भएको छ । बिक्री भएको चामल पनि स्टिम जिरा मसिनो चामल रहेको कम्पनीका प्रमुख विकास कटुवालले बताउनुभयो । चाडपर्वका समयमा राज्यको तर्फबाट दिएको छुटको चामल किन्न उपभोक्ता नआएको कटुवालले बताउनुभयो ।
चाडपर्वलाई लक्षित गरी कम्पनीले तीन हजार क्विन्टल सोना मन्सुली, चार हजार क्विन्टल स्टिम जिरा मसिनो र एक हजार क्विन्टल बासमती चामल कम्पनीले मौज्दात राखेको छ । तर, उपभोक्ताको ध्यान अझै राज्यको सस्तो बिक्री कक्षतर्फ नपुगेको कम्पनीका प्रमुख कटुवालले बताउनुभयो ।
खुला सीमाको फाइदा उठाउँदै उपभोक्ता ठग्न पल्केका खाद्यान्न व्यापारीको सञ्जाल र घर छेउबाटै अलि बढी मूल्यमा नै भए पनि किन्न बानी परेका उपभोक्ताहरूका कारण मिसावट नभएको खाद्य व्यवस्था कम्पनीको चामल खरिद गर्न उपभोक्ता नपुगेपछि चामल त्यसै थन्किएको छ ।
https://ift.tt/eA8V8J
प्रतिक्रिया लेख्नुहोस्