वीरगंज । नेकपा माओवादी केन्द्रका स्थायी कमिटी सदस्य मातृका यादवले ५ दलीय गठबन्धन प्रतिगमन विरुद्धको गठबन्धन भएको हुँदा आउँदो निर्वाचनसम्म सँगै लैजाने बताउनु भएको छ ।
रौतहटको यमुनामाई गाउँपालिकाद्वारा वडा दसैँ, तिहार तथा छठ पर्वको अवसरमा आज आयोजित शुभकामना आदानप्रदान कार्यक्रमलाई सम्बोधन गर्दै नेता यादवले प्रतिगमन विरुद्धको आन्दोलनमा पार्टीका केही गद्दार नेताहरूले धोका दिएको बताउनुभयो ।
उहाँले समग्र आन्दोलनलाई धोका दिएर गएकाहरू फेरी फर्किने मानसिकतामा रहेको हुँदा उनीहरूले जनतासँग माफी मागेर मात्रै पार्टीमा भित्रिने वातावरण बनाउनु पर्ने कुरामा जोड दिनुभयो ।
कार्यक्रममा प्रदेश नम्बर २ का आन्तरिक मामिला तथा सञ्चार मन्त्री भरत प्रसाद साहले सङ्घीयतालाई मजबुत गर्ने जिम्मा ५ दलीय गठबन्धनको हातमा रहेको बताउँदै प्रदेश २ मा प्रहरी समायोजन प्रक्रिया अगाडी बढिसकेको र सङ्घीय सरकारका गृहमन्त्रीसँग सहकार्य भइरहेको बताउनुभयो ।
उहाँले प्रतिगमनलाई परास्त गरी ५ दलीय गठबन्धन अगाडी बढिसकेको र अब समृद्धि र विकासको यात्रालाई कसैले रोक्न नसक्ने दाबी समेत गर्नुभयो ।
यमुनामाई गाउँपालिकाका अध्यक्ष श्रीप्रसाद मुखियाको सभापतित्वमा सम्पन्न कार्यक्रममा प्रतिनिधि सभा सदस्य दिलकुमारी साह, माओवादी केन्द्रका नेता गोपाल ठाकुर, समीर भट्टराई, शिवम साह लगायतको सहभागिता रहेको थियो ।
https://ift.tt/3Fzmot2
प्रतिक्रिया लेख्नुहोस्