राजविराज । तिलाठी कोइलाडी गाउँपालिका अन्तर्गतका सम्पूर्ण संस्थागत विद्यालयहरूमा एकै खालको पाठ्यपुस्तक लागू हुने भएको छ ।
गाउँपालिकाको शिक्षा शाखाका प्रमुख राजेश कुमार झाको अध्यक्षतामा बुधवार बसेको संस्थागत विद्यालयहरूको बैठकले सबै विद्यालयमा एकै खालको पाठ्यपुस्तक लागू गर्ने निर्णय गरेको गाउँपालिकाले जनाएको छ ।
संस्थागत विद्यालयहरूले आगामी शैक्षिक सत्रदेखि आफू खुसी पाठ्यपुस्तक परिवर्तन गर्न नपाउने भएको छ ।
संस्थागत विद्यालयहरूले विद्यार्थीहरूबाट लिने शुल्कमा एकरूपता कायम गर्ने तथा विभिन्न परीक्षाहरू समेत एकै मितिमा सञ्चालन गर्ने निर्णय गरिएको छ ।
संस्थागत विद्यालयहरूले लिने शुल्कमा विभिन्नता भएकोले अभिभावकले बेहोर्न सक्ने र विद्यालय समेत मारमा नपर्ने गरी शुल्क निर्धारण गर्नका लागि शिक्षा शाखा प्रमुखको संयोजकत्वमा एउटा समिति समेत गठन गरिएको छ ।
सो समितिले सबै विद्यालयमा एकरूपता कायम गर्न नर्सरी देखि १० कक्षा सम्मको पाठ्यपुस्तक सम्बन्धमा अध्ययन गरी सूची तयार गर्ने र त्यसमाथि वृहत् छलफल गरी निर्णय गरिने शिक्षा शाखा प्रमुख राजेश कुमार झाले जानकारी दिनुभयो ।
संस्थागत विद्यालयहरूले आफूखुसी प्रायजसो सबै बर्ष कुनै न कुनै पाठ्यपुस्तक परिवर्तन गर्नाले विद्यार्थी मारमा पर्ने गरेकाले सो निर्णय गरिएको उहाँले बताउनुभयो ।
https://ift.tt/eA8V8J
