जनकपुरधाम । जनकपुरधाम सहित मिथिलाञ्चलको मठ मन्दिरहरूमा नियम निष्ठा पूर्वक अन्नकुट पर्व आज धूमधामका साथ मनाइँदै छ ।
प्रत्येक वर्ष कार्तिक शुक्लपक्ष प्रतिपदा तिथिका दिन अन्न कुट पर्व मनाइन्छ । खास गरेर जनकपुरधामका मठ मन्दिरहरूमा छपन्न प्रकारका बेञ्जनहरु तयार पारेर भगवानलाई अर्पण गरी आज साँझ प्रसादको रुपमा सर्वसाधारणलाई अन्नकुटको प्रसाद खुवाउने चलन रहेको छ ।
जनकपुरधामको सीताकुण्डमा २०३२ साल देखि नै भव्य रुपमा अन्नकुट पर्वको आयोजना गर्दै आएको मन्दिरका महन्थ एवं श्रीरामानन्दीय वैष्णव संघका वरिष्ठ उपाध्यक्ष समेत रहनु भएका रामनरेश उपाध्यायले जानकारी दिनु भएको छ ।
जनकपुरधामको सीता कुण्डका अतिरिक्त जानकी मन्दिर, राम मन्दिर , रत्नसागर, अग्निकुण्ड, विहारकुण्डका मठ मंन्दिरहरमा धूमधामका साथ पर्व मनाउने चलन रहेको छ । अन्नकुटको प्रसाद ग्रहणका लागि आफै भक्तजनहरू आउने गरेका छन् ।
खास गरेर भगवान् श्रीरामले लङ्का माथि विजय हासिल गरेर माता सीतालाई फिर्ता ल्याएको खुसीयालीमा परम्परा देखि नै अन्नकुट पर्व मनाउने चलन रहेको छ । खुसीयालीमा ५६ प्रकारका खाद्यान्न सामाग्रीहरू भगवानलाई अर्पण गर्ने चलन रहेको छ ।
जनकपुरधामको सीता कुण्ड स्थानमा तीन हजार भक्तजनहरूले प्रसाद ग्रहण गर्दै आएको पनि महन्थ दासले बताउनु भयो । यसमा प्रयोग हुने अधिकांश सामाग्रीहरू खाद्यान्न नै रहने गरेकाले कृषिलाई अन्नकुटले प्रोत्साहित गर्ने गरेका छन् ।
https://ift.tt/3nXOeal
