वीरगंज । भारतको रक्सौलबाट वीरगंज सिमरा, हेटौडा हुँदै काठमाडौँ पुग्ने रेल मार्ग निर्माणका लागि फाइनल लोकेशन सर्भे शुरु भएको छ ।
गत असोज २२ मा नेपाल र भारत सरकारका उच्च अधिकारीबीच भएको समझदारी पत्र एमओयू अनुसार लोकेशन सर्भे शुरु गरिएको हो । सम्झौताअनुसार यो सर्भे १८ महिनाभित्र सम्पन्न गर्नु पर्ने रेल विभागका महानिर्देशक दीपककुमार भट्टराईले बताउनुभयो ।
विस्तृत सर्भे तथा अध्ययनबाट परियोजनाको विस्तृत रिपोर्ट तयार हुनेछ । त्यसका आधारमा लगानी गर्ने आधार खोजिने भट्टराईले बताउनु भयो । प्रारम्भिक अध्ययनअनुसार रेलमार्गको दूरी १ सय ३६ किमी हुने भएको छ ।
रक्सौल देखि वीरगन्ज स्थित सुक्खा बन्दरगाह हुँदै विस्तार गरिने रेल मार्ग काठमाडौँ सम्म पुग्ने छ । प्रारम्भिक अध्ययनअनुसार रेल मार्गको ४२ किलो मिटर क्षेत्रमा सुरुङ मार्ग बनाइने छ ।
यसको अनुमानित प्रारम्भिक लागत ३ खर्ब रुपैयाँ रहेको छ । डीपीआर तयार भएपछि लागत समेत तलमाथि हुन सक्ने विभागले जनाएको छ ।
https://ift.tt/3G0UZ2U
