जनकपुरधाम । मधेश प्रदेश सरकारले मधेश प्रदेशको पर्यटनको व्यापक सम्भावना रहेको तीन ठाउँमा पर्यटन विकास कार्यालय स्थापना गर्ने निर्णय गरेको छ ।
प्रदेश सरकारको आज बसेको मन्त्रिपरिषद्को बैठकले प्रदेशको उद्योग, पर्यटन, वन तथा वातावरण मन्त्रालयको प्रस्तावमा सिराहाको लहान, धनुषाको जनकपुरधाम र पर्साको वीरगंजमा पर्यटन विकास कार्यालय स्थापना गर्ने निर्णय गरेको छ । खास गरेर तीन वटा शहरलाई विशेष पर्यटकीय क्षेत्रको रुपमा विकास गर्ने प्रदेश सरकारको नीति तथा कार्यक्रम एवं बजेटमा उल्लेख रहेको छ ।
चालु आर्थिक वर्षको बजेटमा तीन ठाउँमा पर्यटन विकास कार्यालय स्थापना गर्ने सरकारले जनाएको थियो । यस्तै वीरगंजमा उद्योग विभाग स्थापना गर्ने निर्णय पनि गरेको प्रदेश सरकारका प्रवक्ता एवं अर्थमन्त्री शैलेन्द्र प्रसाद साहले जानकारी दिनु भयो ।
जनकपुरधाममा सञ्चालनमा रहेको उद्योग, वाणिज्य तथा उपभोक्ता हित संरक्षण निर्देशनालय खारेज गर्ने निर्णय समेत गरेको उहाँले जानकारी दिनु भयो । अहिले सो कार्यालय कामकाज विहीन अवस्थामा रहेका थिए ।
