वीरगंज , भदौ १ —
धान रोपाइँ तथा बाली व्यवस्थापनका लागि किसानलाई मलको आवश्यकता बढिरहेका बेला वीरगंज नाकाबाट ठूलो परिमाणमा युरिया र डिएपी मल भित्रिएको छ।
कृषि सामग्री कम्पनी लिमिटेडको वीरगंज प्रादेशिक कार्यालयका अनुसार साउन महिनामा तीनवटा कन्साइन्मेन्टमार्फत ११ हजार ७१५ टन मल वीरगंज आइपुगेको हो। यसमध्ये ५ हजार ४३१ टन डिएपी र ६ हजार २८४ टन युरिया रहेको छ।
भारतको इन्डियन पोटास लिमिटेड (आईपीएल)मार्फत ५ हजार ४३१ टन डिएपी आएको हो। त्यस्तै, आदित्य बिर्ला कम्पनीमार्फत ५ हजार १११ टन र सन इन्टरनेसनलमार्फत १ हजार १७३ टन युरिया भित्रिएको कम्पनीका सूचना अधिकारी दिनेश शर्माले जानकारी दिएका छन्।
मल बोकेका रेल्वे र्याक भारतको रक्सौल र वीरगंजस्थित सिर्सिया सुक्खा बन्दरगाह हुँदै क्रमशः भित्रिरहेका छन्। तीनवटै कन्साइन्मेन्टबाट ३०/३० हजार टन मल ल्याउने तयारी रहेको कम्पनीले जनाएको छ।
वीरगंज भित्रिएको मल वीरगंजसहित भैरहवा र विराटनगरका प्रादेशिक कार्यालयमार्फत वितरण गरिनेछ। किसानले मागअनुसार मल नपाएको गुनासो गरिरहेका बेला नयाँ खेप भित्रिन थालेपछि मल अभाव केही कम हुने अपेक्षा गरिएको छ।
