पोखरिया , भदौ ४ –
“समाजसेवी”, “विकासप्रेमी” र “जनताको आवाज” भनेर सम्बोधन गरिँदा नेजामुद्दीन शमानी त्यसलाई केवल सम्मानका रूपमा मात्र नलिने बताउँछन्। उनका लागि यस्ता सम्बोधन जनताको विश्वाससँगै थप जिम्मेवारी र निरन्तर काम गर्ने प्रेरणा हुन्।
लायन्स क्लब अफ पोखरियाका अध्यक्षसमेत रहेका शमानीले आफ्नो सार्वजनिक जीवन समाजसेवा र विकास निर्माणमा मात्र सीमित नभएको बताएका छन्। उनको राजनीतिक यात्रा पनि सार्वजनिक जीवनको महत्वपूर्ण हिस्सा रहेको उल्लेख गर्दै उनले जनआन्दोलन तथा मधेश आन्दोलनका क्रममा जनताको अधिकार, पहिचान, सम्मान र न्यायका लागि गरेको संघर्षलाई आफ्नो जीवनको महत्वपूर्ण अध्यायका रूपमा प्रस्तुत गरेका छन्।
आन्दोलनका क्रममा जेल तथा हिरासतमा बस्नुपरेको र विभिन्न दबाब तथा चुनौतीको सामना गर्नुपरेको स्मरण गर्दै शमानीले ती संघर्षलाई पीडाका रूपमा मात्र नभई जनताको अधिकारका लागि उभिएको आफ्नो सार्वजनिक यात्राको महत्वपूर्ण इतिहास र अनुभवका रूपमा लिएको बताएका छन्।
उनका अनुसार समाजसेवामार्फत जनताको दुःख, पीडा र आवश्यकता बुझ्ने प्रयास गर्दै आएका छन् भने विकास निर्माणका माध्यमबाट जनताका आधारभूत आवश्यकता पूरा गर्न तथा क्षेत्रको समग्र विकासमा योगदान पुर्याउने प्रयास निरन्तर जारी छ।
शमानीले आफ्नो नेतृत्वमा विभिन्न राजनीतिक दल तथा नागरिक समाजका प्रतिनिधिहरूलाई समेटेर संघर्ष समिति गठन गरी पोखरियामा मालपोत कार्यालय र नापी कार्यालय स्थापना गराउन पहल गरेको तथा पोखरियामा प्रादेशिक अस्पताल निर्माण तथा स्तरोन्नतिका लागि निरन्तर पहल गर्दै आएको बताएका छन्।
स्वास्थ्य, शिक्षा, खानेपानी, सिँचाइ, सडक तथा पुल निर्माणदेखि वृक्षारोपण, पार्क र सार्वजनिक स्थलको विकाससम्मका जनसरोकारका विषयलाई आफूले प्राथमिकताका साथ उठाउँदै आएको उनको भनाइ छ।
त्यसैगरी, मठमन्दिर, मस्जिद, ईदगाह, कब्रिस्तान, प्रतीक्षालयलगायत धार्मिक, सांस्कृतिक तथा सार्वजनिक संरचनाको निर्माण, संरक्षण र स्तरोन्नतिका लागि विभिन्न राजनीतिक दलका नेता तथा प्रतिनिधि, उद्योगी–व्यवसायी र नागरिक समाजका अगुवासँग समन्वय तथा सहकार्य गर्दै आएको उनले बताएका छन्।
“विकास भनेको केवल सडक, पुल र भवन निर्माण गर्नु मात्र होइन,” शमानी भन्छन्, “विकास भनेको जनताको दैनिक जीवन सहज बनाउनु, आधारभूत आवश्यकता पूरा गर्नु र सम्मानपूर्वक बाँच्ने वातावरण निर्माण गर्नु हो।”
स्वास्थ्य सेवाको क्षेत्रमा सर्वसाधारणले सहज, सुलभ र निःशुल्क सेवा पाउन सकून् भन्ने उद्देश्यले विभिन्न सामाजिक संघ–संस्था तथा सेवाभावी व्यक्तिहरूसँग सहकार्य गर्दै आएको उनले बताए। स्वास्थ्य शिविर, आँखा परीक्षण, मोतियाबिन्दुको उपचार तथा शल्यक्रिया, रक्तदान, कम्बल वितरण, अस्पताल तथा विद्यालयमा स्टिल चेयर र पंखा जडान, औषधि तथा स्वास्थ्य सामग्री सहयोगलगायतका सेवामूलक अभियानमा आफू सहभागी हुँदै आएको उनको भनाइ छ।
राजनीतिमा पद प्राप्त गर्नुभन्दा जनताको विश्वास प्राप्त गर्नु ठूलो कुरा भएको शमानीको धारणा छ। उनका अनुसार राजनीति चुनाव जित्ने वा पद प्राप्त गर्ने माध्यम मात्र नभई जनताको आवाज राज्यसम्म पुर्याउने, अन्यायविरुद्ध बोल्ने, अधिकार र पहिचानका पक्षमा उभिने तथा समाजमा सकारात्मक परिवर्तनका लागि निरन्तर प्रयास गर्ने माध्यम हो।
आफूले गरेका कामको प्रशंसासँगै गलत भएका विषयमा आलोचना र खबरदारीलाई पनि स्वीकार गर्नुपर्ने बताउँदै उनले लोकतन्त्रमा रचनात्मक आलोचनाको महत्वपूर्ण भूमिका रहने उल्लेख गरेका छन्।
“इतिहास केवल पद, प्रतिष्ठा र राजनीतिक हैसियतले लेखिँदैन; संघर्ष, त्याग, योगदान र जनताको पक्षमा उभिएको समयले पनि इतिहास निर्माण गर्छ,” शमानीको भनाइ छ।
उनले आफ्नो परिचयलाई केवल “समाजसेवी” वा “विकासप्रेमी” शब्दमा सीमित नगरी सामाजिक सेवा, विकास निर्माण, राजनीतिक संघर्ष र जनताको अधिकारका पक्षमा गरेको योगदानलाई समग्र रूपमा बुझ्न आग्रह गरेका छन्।
जनताको दुःखमा साथ दिने, विकासका लागि निरन्तर आवाज उठाउने, अन्यायविरुद्ध निर्भीक भएर बोल्ने, अधिकार र पहिचानको पक्षमा उभिने तथा जनताको आवश्यकता र समस्या राज्यसम्म पुर्याउने आफ्नो सार्वजनिक जीवनको मूल उद्देश्य रहेको शमानीले बताएका छन्।
उनले भनेका छन्, “मानव सेवा नै सबैभन्दा ठूलो धर्म हो। जनताको सेवा, विकासको अभियान र अधिकारको संघर्ष—मेरो सार्वजनिक यात्राका तीन आधार हुन्।”
— नेजामुद्दीन शमानी
अध्यक्ष, लायन्स क्लब अफ पोखरिया
