जनकपुरधाम । सङ्घीयताको प्रभावकारी कार्यान्वयन गर्नका लागि मद्दत गर्ने उद्देश्यले राष्ट्रिय योजना आयोगले प्रदेश सरकारका विभिन्न मन्त्रालयहरूका उच्च अधिकारीहरूको क्षमता विकासका लागि दुई दिने कार्यक्रम जनकपुरधाममा शुरु भएको छ ।
प्रदेश नंं २ सरकारका मुख्यमन्त्री तथा मन्त्रीपरिषद्का कार्यालय, विभिन्न मन्त्रालयहरू, प्रदेश नीति तथा योजना आयोगका उच्च अधिकारीहरू सहभागी रहनु भएको सो कार्यक्रममा राष्ट्रिय योजना आयोगका सहसचिव डा. किरण रुपाखेती, उपसचिव डा. नारायण राज पौडेलले मध्यकालीन खर्च संरचना, आयोजना बैङ्क, समपूरक तथा विशेष अनुदान सफ्टवेयरका विषयमा प्रशिक्षण दिइरहनु भएको छ ।
प्रदेश नंं २ बाट गत आर्थिक वर्षमा प्रक्रिया पुर्याएर निक्कै कम योजना माग गरेको जानकारी दिँदै योजना आयोगका सहसचिव डा. किरण रुपाखेतीले कागजी प्रक्रिया नपुगेको योजनाहरू माग गर्दा निकासा नहुने गरेको बताउँदै कागजी प्रक्रिया पुरा गरेर योजना माग गर्नका लागि सुझाव दिनुभयो ।
प्रदेश नंं २ को धनुषा, महोत्तरी, सर्लाही तथा सिरहा जिल्लाका स्थानीय निकायका प्रतिनिधिहरू पनि सहभागी भएको सो कार्यक्रमको उद्घाटन प्रदेश नंं २ का मुख्यमन्त्री लालबाबु राउतले गर्नु भएको थियो ।
कार्यक्रममा बोल्दै मुख्यमन्त्री राउतले कर्मचारी संयन्त्रबाट पाउनु पर्ने सहयोग नपाएका कारणले प्रदेश नंं २ ले कतिपय विकासको कामकाज गर्न नसकेको बताउनुभयो ।
उहाँले पछिल्लो चरणमा अनुभवी र क्षमतावान् सचिवहरू मन्त्रालयमा पठाउने गरेको भए पनि सुरुको समयमा प्रदेशमा काम हुन नदिनकै लागि काम नगर्ने खालको कर्मचारी पठाउने गरेको आरोप लगाउनु भयो ।
मुख्यमन्त्री राउतले सङ्घीयताका मूल मर्म समानुपातिकता, समावेशिता र जनसङ्ख्याको आधार राज्यको हरेक क्षेत्रमा सहभागिता गराउनु भएको र यसका लागि आफूले गरेको काम र त्यसको परिणाम दश पन्ध्र वर्ष पछि देखिने बताउनुभयो ।
कार्यक्रममा राष्ट्रिय योजना आयोगका सदस्य उमाशङ्कर प्रसाद साहले सङ्घीयतालाई बलियो बनाउनका लागि जनताको विकास प्रतिको चाहना पुरा गर्नका लागि तीनै तहका सरकारका बीचमा समन्वय तथा सहकार्य जरुरी रहेको बताउनुभयो ।
प्रदेश नीति तथा योजना आयोगका उपाध्यक्ष डा.भोगेन्द्र झाले विकासको दृष्टिकोणले पछाडि परेको प्रदेश २ को विकास विना मुलुकको विकासको कल्पना गर्न नसक्ने भएकाले प्रदेश २ मा बढी योजना दिनका लागि आग्रह गर्नु भयो । प्रदेश २ का मुख्य सचिव हरि प्रसाद मैनालीले सङ्घीयताको सफलताको लागि जनचाहना अनुसारको विकासको कामकाज हुन जरुरी रहेको बताउनुभयो ।
भोलिसम्म चल्ने सो कार्यक्रममा प्रदेश तथा स्थानीय तहमा भएको समस्याहरूको विषयमा पनि छलफल हुनेछ ।
https://ift.tt/3JpHfks
प्रतिक्रिया लेख्नुहोस्