वीरगंज , भदौ ९ —
सरकारले वीरगंज चिनी कारखाना पुनः सञ्चालनको सम्भाव्यता अध्ययन गर्न कार्यदल गठन गरेपछि टोलीले मंगलबार कारखाना परिसरको स्थलगत निरीक्षण गरेको छ।
उद्योग, वाणिज्य तथा आपूर्ति मन्त्रालयले भदौ १ गते कारखानाको वर्तमान अवस्था, विगतका निर्णय तथा यसअघि तयार भएका अध्ययन र प्रतिवेदनको समीक्षा गरी पुनः सञ्चालनको सम्भाव्यता र आवश्यक कार्ययोजना तयार गर्न कार्यदल गठन गरेको हो।
कार्यदलको संयोजकमा मन्त्रालयका सिडिई श्रीकान्त यादव तथा सदस्यमा शाखा अधिकृत ज्योति पौडेल र मन्त्रालयका सल्लाहकार श्याम शर्मा रहेका छन्। कार्यदलले १५ दिनभित्र प्रतिवेदन बुझाउनुपर्ने जिम्मेवारी पाएको छ।
टोलीले कारखाना परिसरमा रहेका भवन, संरचना, मेसिनरी तथा पार्टपुर्जाको वर्तमान अवस्था र पुनः प्रयोग गर्न सकिने अवस्थाबारे समेत अध्ययन गरिरहेको छ।
