एजेन्सी , साउन २६ —
अमेरिकी राष्ट्रपति डोनाल्ड ट्रम्पले बालबालिकालाई दिइने नियमित खोपको संख्या सीमित गर्ने आदेशमा हस्ताक्षर गरेका छन्।
ट्रम्पको आदेशअनुसार अमेरिकन एकेडेमी अफ पेडियाट्रिक्सले सिफारिस गरेका बाल्यकालीन खोपको संख्या १८ बाट घटाएर ११ मा सीमित गर्ने प्रस्ताव गरिएको छ।
प्रस्तावित सूचीमा दादुरा, हाँडे, डुबेला (एमएमआर), डिप्थेरिया, धनुष्टंकार, पोलियो, हेमोफिलस इन्फ्लुएन्जा टाइप बी, न्यूमोकोकल रोग, एचपीभी र चिकेनपक्सविरुद्धका खोप समावेश छन्।
ट्रम्पले बालबालिकाले विगतको तुलनामा अहिले धेरै खोप लगाउने गरेको भन्दै खोपको संख्या घटाउनुपर्ने बताएका छन्। उनले विगतमा बालबालिकाले कम खोप लगाउने गरेको र त्यतिबेला अटिजमको दर पनि कम रहेको दाबी गरेका छन्।
तर वैज्ञानिक अध्ययनहरूले खोप र अटिजमबीच कुनै सम्बन्ध नरहेको देखाएका छन्। चिकित्सकीय प्रमाणहरूले एमएमआर खोपलाई समेत सुरक्षित र प्रभावकारी मान्दै आएका छन्।
ट्रम्पले एमएमआर खोप एकैपटक दिँदा बालबालिकाको शरीरमा अत्यधिक मात्रा पर्ने भन्दै खोपको मात्रा र समयबारे प्रश्न उठाएका छन्।
यद्यपि चिकित्सकीय निकायहरूले बालबालिकालाई रोगबाट सुरक्षित राख्न प्रमाणमा आधारित खोप तालिका महत्वपूर्ण रहेको बताउँदै आएका छन्।
